حکوومەتی هەرێم بەردەوام بووە لە هەڕەشە کردن لەسەر مافە سەرەتاییەکانی مرۆڤ
بەشی عێراق و هەرێمی کوردستان- رێکخراوی چاودێریی مافەکانی مرۆڤ  رایگەیاند: حکوومەتی هەرێمی کوردستان سەرەڕای راگەیاندنی پلانێکی درێژخایەن بۆ چارەسەرکردنی کێشەکانی مافی مرۆڤ، بەڵام لە ساڵی 2022دا بەردەوام بووە لە هەڕەشەکردن لە مافە سەرەتاییەکانی مرۆڤ.

بەپێی هەواڵی کوردپرێس، رێکخراوی چاودێریی مافەکانی مرۆڤ (هیومان رایتس وۆچ) ئەمڕۆ راپۆرتی خۆی بۆ ساڵی 2022ـی لەبارەی رەوشی مافەکانی مرۆڤ لە جیهان بڵاو کردەوە و تیایدا جەخت دەکاتەوە لەوەی ساڵی رابردووش هاوشێوەی ساڵانی پێشتر مافەکانی مرۆڤ لە جیهاندا لەژێر هەڕەشەی هەمەلایەندا بووە.

ئەو ڕێکخراوەیە پەیوەست بە هەرێمی کوردستانی دەڵێت :حکوومەتی هەرێم لە  ساڵی 2022دا بەردەوام بووە لە هەڕەشەکردن لەسەر مافە سەرەتاییەکانی مرۆڤ و رێکخراوەکانی کۆمەڵگەی مەدەنی."

هیومان رایتس وۆچ زیادی دەکات: "حکوومەتی هەرێم ژمارەیەک یاسا کە ناوەڕۆکەکەیان ڕوون نییە لەدژی رەخنەگرانی بەکاریهێناون کە بۆچوون و رای خۆیان بەرامبەر حکوومەت خستوەتەڕوو، هەروەها لە ئابی ساڵی رابردوودا بەهۆی داواکردنی خۆپیشاندانێکەوە، حکوومەتی هەرێم دەیان رۆژنامەنووس و چالاکوانی دەستگیر کرد".