مەزڵوم کۆبانێ: گەڕانەوەی كورد بۆ عەفرین ئامانجی سەرکیی ئێمەیە
بەشی سووریا- فەرماندەی گشتیی هێزەكانی سووریای دیموكرات، ڕایگەیاند، ڕزگاركردنی عەفرین لەدەست داگیركاری توركیا یەكێكە لە ئامانجە سەرەكییەكانی هێزەكانیان.

بەپێی هەواڵی کوردپرێس، مەزڵوم کۆبانێ فەرماندەی گشتیی هێزەكانی سووریای دیموكرات (SDF) لە تویتێكدا ڕایگەیاند: "پرسی عەفرین، گەڕانەوەی كورد، ڕزگاركردنی ناوچەكە لە داگیركاری و پووچەڵكردنەوەی هەوڵەكانی فراوانكردنی داگیركەری توركیا لە ئامانجە سەرەكییەكانمانن".

كۆبانێ جەختی کردەوە: بەرخۆدانی سەردەم تا سەركەوتن بەردەوام دەبێت، بەرخوودانی سەردەم بە ناوی شەڕی 58 ڕۆژی دژی هێرشی توركیا و گرووپە چەكدارەكانی ئۆپۆزسیۆنی سووریا بۆ سەر عەفرین كراوە.

شایانی باسە هەینی ڕابردوو، پێنجەمین ساڵیادی داگیركردنی شاری عەفرین بوو لەلایەن توركیا و گرووپە چەكدارەكانی ئۆپۆزسیۆنی سووریای سەر بە ئەنقەرەوە، دوێنێ شارەكانی كوردستانی سووریا بەم بۆنەیەوە خۆپیشاندانی ناڕەزایەتییان ئەنجامدا بۆ ئیدانەكردنی هێرشەكانی توركیا بۆ سەر ناوچەكە.