بەپێی هەواڵی کوردپرێس، سەرۆکایەتیی کۆماری عێراق دەقی پەیامێکی پیرۆزبایی بەرهەم ساڵح، سەرۆک کۆماری عێراقی بڵاو کردەوە کە ئاڕاستەی جۆ بایدن سەرۆکی ویلایەتە یەکگرتووەکانی ئەمریکای کردووە.

لەبەشێکی پەیامەکەدا هاتووە، "گەرمترین و جوانترین پیرۆزبایتان لێدەکەم بەبۆنەی دەستبەکاربوونتان وەک سەرۆکی ویلایەتە یەکگرتووەکانی ئەمریکا و هیوای سەرکەوتن بۆ بەرێزت و بەرێز ھاریس جێگری سەرۆک دەخوازم بۆ ئەرک و هەوڵەکانی داهاتووتان و ھێنانەدی خواستەکانی گەلی ئەمریکا".

ئەوەش هاتووە، لەو روانگەیەوە بەگرنگییەوە دەڕوانینە بونیادنانی پەیوەندییێکی پتەوتر لە نێوان عێراق و ئەمریکا و فراوان کردنی هاریکاریی ستراتیژی کە ھەردوو وڵات بەیەکەوە گرێ دەدات، ھاوکات وەک دەزانن بەیەکەوە ڕووبەڕووی چەندین ئاڵنگاری دەبینەوە، بەتایبەتی تیرۆر و توندرەوەی، بۆیە لە بەرژەوەندیی هاوبەشمانە بەیەکەوە ڕووبەڕوویان ببێنەوە، ھەروەک دەرفەتی کارکردن لەگەڵ ویلایەتە یەکگرتووەکانی ئەمریکا لە نزیکەوە دەقۆزینەوە لەپێناو کەم کردنەوەی گرژییەکانی ناوچەکە و بەهێزکردنی ئاشتی و سەقامگیری لە رۆژھەڵاتی ناوەڕاست.

بەرهەم ساڵح لەکۆتایی پەیامەکەدا ئەوەشی خستوەتەڕوو، "ئومێدەوارم کە پەیوندییەکانی نێوان هەردوو وڵات بەهێزتر بکەین لە مانگ و ساڵەکانی داهاتوو، ھەروەھا دانانی نەخشە رێگایێک بە ئاڕاستەی ھێنانەکایەوەی عێراق و رۆژھەڵاتی ناوەڕاستی ئارام و خۆشگوزەران تر و هەنگاونان بەرەو بنەمای رێزگرتنی هاوبەش و ھێنانەدی بەهاکانی ئازادی و دیموکراسی".

کۆدی هەواڵنێر: 60113