ڕۆژی ۲۱ی مانگی ۶ ی ئەمساڵ، شاندێکی وەزارەتی بەرگریی ئەمریکا بەسەرۆکایەتی دانا سترۆڵ جێگری یاریدەدەری وەزیری بەرگری ئەمریکا بۆ کاروباری ڕۆژهەڵاتی ناوەڕاست، لە شاری هەولێر لەگەڵ مەسروور بارزانی سەرۆکی حکوومەت و هەندێک لە فەرماندەکانی پێشمەرگەدا کۆبووەوە.
سەرچاوە باڵاکە لە وەزارەتی پێشمەرگە بەو مەرجەی ناوی نەهێنرێت، پەیامەکانی جێگری وەزیری بەرگری ئەمریکای بۆ دەنگی ئەمەریکا ئاشکرا کرد و وتی: "ئەمریکا نیگەرانە لە ئاستەنگەکانی بەردەم چاکسازی و یەکخستنەوەی پێشمەرگە، جێگری یاریدەدەری وەزیری بەرگری ئەو وڵاتە بە بەرپرسانی هەرێمی وت، ناتوانین پاڵپشتییەکانمان بۆ ئێوە بەردەوام بێت، گەر دۆخی وەزارەت بەمشێوەیە بمێنێتەوە و پرۆسەی چاکسازی و رێکخستنەوەی پێشمەرگە بەڕێوەنەچێت."
هەروەها وتیشی: "حزبایەتی بەتەواوەتی ڕەنگدانەوەی هەبووە لەسەر کاروبارەکانی وەزارەت و ململانێکان بە ئاشکرا هەستیان پێدەکرێت، لەکاتێکدا هاوپەیمانان دەیانەوێت قۆناغ قۆناغ هێزەکانی ۷۰ و ۸۰ی پارتی و یەکێتی یەکبخەنەوە و حزبایەتی لەو وەزارەتەدا کاڵ بکەنەوە."
نظر شما