چوارچێوەی هاوئاهەنگی دەیەوێت یەکێتی و پارتی بەشدار بن لە حکوومەتی داهاتووی عێراقدا
بەشی عێراق و هەرێمی کوردستان- سەرۆکی فراکسیۆنی یەکێتی لە پەرلەمانی عێراق؛ جەخت دەکاتەوە چوارچێوەی هاوئاهەنگی دەیەوێت یەکێتی و پارتی بەشدار بن لە حکوومەتی داهاتووی عێراقدا و نایەوێت ئەم دوو حزبە بخاتە پەراوێزەوە.

بەپێی هەواڵی کوردپرێس، هەرێم کەمال ئاغا، سەرۆکی فراکسیۆنی یەکێتیی نیشتمانیی کوردستان لە پەرلەمانی عێراق، بە ڕووداوی گوت: "ئەم هەفتەیە، هەفتەی کۆتایی ململانێ و کۆبوونەوەکان و گفتوگۆکانی چوارچێوەی هاوئاهەنگییە، رەنگە بە ئاراستەیەکیش بڕوات بگاتە ئاستی هەڵوەشانەوەی پەرلەمان، بۆیە گفتوگۆکان لە نێوماڵی شیعە لەم رۆژانە دەبێتە یەکلا بکرێتەوە."

گوتیشی: "دووبارە دروستبوونەوەی سێیەکی پەکخەر بە واتای هەڵوەشاندنەوەی پەرلەمان دێت، بەڵام  قورسە سێیەکی پەکخەر دروستبێتەوە، چوونکە 73 پەرلەمانتاری فراکسیۆنی سەدر کشاونەتەوە و ئەوانەی لە جێگەیان هاوتونەتە پەرلەمان لە چوارچێوەی هاوئاهەنگین."

هەرێم کەمال ئاغا، ئاماژەی بەوەش کرد: "ئێمە رژدین لەسەر کاندیدی خۆمان کە بەرهەم ساڵحە، پارتیش پێداگری لە بەربژێری خۆی دەکات، هەربۆیە بە دوو تیمی جیاواز لە بەغدا هەریەکە و کار بۆ بەربژێری خۆی دەکات، هیوادارین بتوانین لەم رۆژانەدا لەسەر ئەو پرسە بگەینە رێککەوتن."

سەرۆکی فراکسیۆنی یەکێتی دەشڵێت: "ئەگەر کورد لەسەر بەربژێرێکی هاوبەش رێکنەکەوێت، چوارچێوەی هاوئاهەنگی دەنگ بە بەربژێری یەکێتی دەدات."

هەرێم کەمال ئاغا ڕاشیگەیاند: چوارچێوەی هاوئاهەنگی دەیانەوێت یەکێتی و پارتی بەشداربن لە حکومەتدا و هەردووکیان پێکەوە کاریگەرییان زیاتر دەبێت، چوارچێوەی هاوئاهەنگی نایەوێت پارتی و یەکێتی فەرامۆش بکات.

ناوبراو  ئاماژە بەوەش دەکات: "پێمان باش نییە پارتی لە پرۆسەی سیاسیی عێراق بکشێتەوە، ئەگەریش پارتی بەشداری حکوومەت نەکات، یەکێتی بەشداریی حکوومەت دەکات." جەختی لەوەش کردەوە: "هیچ وادەیەک بۆ کۆبوونەوەی یەکێتی و پارتی دیاری نەکراوە."